Act 24 | NAS | STEP | Eeꞌnoko paꞌnokoꞌ doong tankinuko tee piristiꞌnanka-koo pankaing Ananaiasi daampeto pouꞌ niiꞌning koompaaraꞌnavitu-koo pankenanka ninka eeꞌnoko naning narung nariꞌ tuutunang~koo kara-tavoꞌ miring Teetalas. Eeꞌnoko teinge tavoꞌauꞌ tee-anko ovoꞌmaꞌanko tee biikaang kara Paulaꞌ tuumpiauꞌnaare.

Acts 24

Juꞌkoo Ovontunge Paulaꞌ Koosiauꞌnaꞌ Piiliks-ankoa

1 Eeꞌnoko paꞌnokoꞌ doong tankinuko tee piristiꞌnanka-koo pankaing Ananaiasi daampeto pouꞌ niiꞌning koompaaraꞌnavitu-koo pankenanka ninka eeꞌnoko naning narung nariꞌ tuutunang~koo kara-tavoꞌ miring Teetalas. Eeꞌnoko teinge tavoꞌauꞌ tee-anko ovoꞌmaꞌanko tee biikaang kara Paulaꞌ tuumpiauꞌnaare. 2 Teketa ovoꞌmaꞌke Paulaꞌ bokuvuko Teetalasie kara tuumpi tutumpuma aaꞌpuuꞌ, “Ee daꞌ pankaing, Piiliks, daꞌ otoko niiꞌ tampaꞌ mooa-koo oꞌnorimaung eeꞌnoko niiꞌ Juꞌnupoong pakumerima aarumo tampeng tavoꞌantavemaunge; 3 Osi ookara-koo avutevuꞌmariri niiꞌke arooꞌampimaung ookara tampaꞌ nariꞌ tampampima. 4 Teka iirauꞌantarampiꞌneeng-koo tampaꞌ tange bakeama enang aaꞌdamaang ninge, tampaꞌ noruꞌmeri ioꞌ baroromeriaing niiꞌ okiꞌnooꞌ. 5 Niiꞌke tee aung naning taarapiika ooampimaung, turang-anta-nko ooampimaung ookara Juꞌnupoong-koo ookutunairu-koo otoroining-koo, eeꞌnoko napoꞌ narunge biumareeꞌ tevitu-koo nerakavitu tee Nasaretiꞌnung siompaamanavitu-koo. 6 Eeꞌnoko napoꞌ niiꞌ Kumponing-ankoi dootuuꞌnava pankava-koo dootuuꞌmariko orari-anta-koo paaramuruꞌ, teka teeꞌ nkoarako niiꞌke daiꞌampiruꞌ; 7 Niiꞌke niikaang boto siompampiri paaravampiiꞌnaang tampampiko teie Lisiasie, teing kivora daakuꞌ piatooronuka tanatai, aaꞌnaꞌ iriꞌoi niikaang bireng-eta pariꞌmurira aaꞌmuruꞌ, ‘Diiꞌ tuumpi nkonuka ovoꞌmaꞌanko berira tuumpireeriaing.’ 8 Teka daka dake tanaꞌera noruꞌeaing tee ookara kapooꞌnanka niiꞌke tee tuumpiampirining masikeng.” 9 Eeꞌnoko teinge Juꞌnupoonge ookara kapooꞌnanka Teetalasie tuumpivukoꞌning-koo masikee-antavaakoꞌ.

Piiliksie Simpeꞌui otoko Paulaꞌ Siraꞌparama Kara Nauvuuꞌnaꞌ

10 Eeꞌnoko tenang teie ovoꞌmaꞌke kara-koo botovuuꞌnang tee Paulaꞌke makuꞌuma aaꞌpuuꞌ, “Ning dotumari penkemaraaꞌnaang teing-koo kara tuumpimauꞌning-koo daꞌ tasiꞌdansi mmauꞌ mareꞌkoo daꞌ kara-simpeꞌ deentari otomaung-koo. 11 Dake niaꞌeriko masikee-antamaavaing, baruꞌ doong kivora-ita keꞌmunta divuꞌuaruko ning Jerusalemaꞌaape deto dootuuꞌkoo meuꞌ. 12 Eeꞌnoko ainge ning oomaavaꞌ tataꞌmeeriko dootuuꞌnava pankava-koo. Napoꞌ oomaavaꞌ tavutavuꞌ tutumpanko dootuuꞌnavananka okiꞌnarekaꞌkoo eeꞌnoko osi pankamono-koo. 13 Teing napoꞌ masikaꞌpariarupeuꞌ daꞌ nauraama teing kapooꞌ enang ning tuumpimaamaatomaing-koo.

14 “Teka tee aung ning enang daꞌkoo siraꞌmaraaꞌnaang: Ning tee Kumponing-koo dootuuꞌmaramaung niikakatauro biikaang-koo tevung nerakavung daang-koonavung tampaamanavung siompansi, masikaꞌantavansi teing ookutuning kapooꞌ Moosesi-nung botoi minkuvui otomaing eeꞌnoko Kumponing-etaning nakaro-nupoonge tero daariauꞌning, 15 eeꞌnoko Kumponinge maraka-anta dupearavainooꞌ nempansitaaꞌ teeꞌ nariꞌ aing nkoarimanaꞌ booꞌketa daaꞌ noruꞌampiri ookeng-koo aaꞌnoko teing koontoꞌnuka eeꞌnoko teing koontoꞌnuka deeaing. 16 Teeꞌkoo ning paaramaramaung domang kiiroraaꞌmari oꞌnooꞌnaang Kumponing-ankoi eeꞌnoko nantoong-ankoi.

17 “Enang tee niiꞌning mareꞌ tankinuioꞌ toromaruꞌ nkanavitu-anko avuavuꞌ mooniꞌ ataꞌoinkuꞌkoo tavoꞌama eeꞌnoko boontunamaraaꞌnaang. 18 Teeꞌ nkomarako teinge ning oomauꞌ kiiroraaꞌmarama pava dootuuꞌnava pankava-koo kuunge, nantoong karinga eeꞌnoko naampa dovang otoaruko, teka Juꞌnupoong naing Eesiaꞌketa porouꞌning teke otoroko. 19 Teing eeꞌning aꞌ daꞌanko porora ning tuumpi-koo makosinuka kapooꞌ ning tuumpi-koo makosi otoꞌevoroi deekoꞌ. 20 Niiꞌnooꞌ ainge koompaaraꞌnavitu biiꞌka tuumpimaavai kapooꞌ orara taaravauꞌnung deekoꞌ nkaang kara simpeꞌaama teka Jerusalemaꞌka. 21 Teka tee kapooꞌ niiꞌnung otoaꞌ, aung narung tuumpimaamaatomaung otong tee tenang uroꞌkanooꞌke teing-koo donkonansi bokuma aaꞌpantuꞌnung, ‘Ninge tee napoꞌ booꞌketa daaꞌ narung masikaꞌantavamaung-koo diiꞌke eꞌmung tuumpimerimaang.’”

22 Teka teie Piiliksie, bane tevung nerakavung taung sirakaꞌpui tampaꞌ tasiꞌpukoꞌnunge, teka totoꞌpura aaꞌpuuꞌ, “Tenang Lisias tee piatooronuka-koong boreꞌ daampeto poainang ninge simpeꞌampaing aung kara daꞌkoong.” 23 Teketa tenang tee piatooronuka daakuꞌ tarenara botovuuꞌ teie tee Paulaꞌ tee ninka tareaioꞌ otooꞌnaang teka baruꞌ kiimata-pinaꞌ deeaꞌ. Eeꞌnoko baꞌmaikoriꞌke beeroꞌkoo orokoaavaꞌ piavoaining-koo pakuaama.

Piiliksie Paulaꞌ Kiimatanava-koo Kemareꞌka-koo Pinkaꞌuuꞌnaꞌ

24 Teketa niiꞌning doong tankinuko Piiliks baꞌaang ninka Juꞌkoonani miring Darusila ninka poreta botoaruꞌ Paulaꞌ poꞌantavaavaꞌnaang eeꞌnoko taaravuuꞌ minkuvuko Jiisuuꞌ tero Pakoꞌpariꞌniiꞌ masikaꞌanta-koonavung. 25 Eeꞌnoko tenang Paulaꞌke toꞌbiiari aing aaꞌning-koo minkuvuko: koontoꞌ nkonaꞌ, baka tarenaꞌ, eeꞌnoko doong asiꞌnaꞌmung tuutunang nkoaravaing-koo, Piiliksie avorora aaꞌpuuꞌ, “Ioꞌ beaing anketa. Niiꞌnang batei ooamira bokurampaing napoꞌ.” 26 Napoꞌ eeꞌ noruꞌukoꞌ, “Ning pa mooniꞌ amuuꞌnaang Paulaꞌke damaꞌke napoꞌ bokuanko.” Teeꞌkoo mmauꞌ namuꞌpie bokuvuma minkuarekoꞌ. 27 Teka kemareꞌka tankinuko Poosias Peestasie Piiliks pariꞌantavuuꞌ, teka Piiliks tenkenuma Juꞌnupoong dotu-anta-koo Paulaꞌ teke kiimatanava-koo pinkaꞌari otoko sipuuꞌ.